Их хуралдай орд өргөө

Монголын Хот Байгуулалтын Хөгжлийн Танхимаас жил бүр зохион байгуулдаг "Шилдэг барилга" шалгаруулах арга хэмжээнд "Үндэсний хэв маягийг орчин үеийн хийц технологитой хослуулан Монгол инженерүүдийн уран сэтгэмж, дархан ухаанаар бүтээн байгуулсан интерьерийн онцгой шийдэл бүхий барилга байгууламж" үндэслэлээр 2025 оны Шилдэг барилгаар шалгарсан ИХ ХУРАЛДАЙ орд өргөө цогцолборыг танилцуулж байна. Хэнтий аймгийн Засаг Даргын Тамгын газрын захиалгаар Гүйцэтгэгч - Ди Эс Ти ХХК-ийн Нутгийн баруун мод, Мөнх Өргөө ХХК -ийн гүйцэтгэсэн бүтээн байгуулалт. Хэнтий аймгийн Биндэр суманд 1206 онд Их Эзэн Чингис хаан “Их Хуралдай”-г зарлаж, Их Монгол улсыг тунхаглаж байсан түүхэн дурсгалт газруудын нэг гэдгээрээ гадаадыг болон дотоодын жуулчдын анхаарлыг татдаг газар юм. Тус цогцолбор нь гэр хэлбэрийн музей, ёслол хүндэтгэлийн барилга бөгөөд гол өргөө нь 21м диаметртэй, 21м-н өндөртэй, 1,5м суурьтай, 9 үе шаттай, 500 хүний багтаамжтай өргөө юм. Монголчуудын мандан бадрах, сүр хүч, эв нэгдэл, хийморь сүлдний бэлгэдэл, есөн хөлт цагаан тугийг нэгэн цагт орчлон дэлхийг эрхшээж байсан утга санаагаар бөмбөрцгийн тал хэлбэртэй орд өргөөний ертөнцийн босоо тэнхлэгийн илэрхийлэл болох гэрийн баганатай нягт уялдуулан цогцлоосон архитектурын өвөрмөц шийдлээр бүтээж. Нөгөө талаар монголчуудын гэрийн баганаар дамжин мөнх тэнгэр, өвөг дээдсийн сүнстэй холбогддог хэмээн үздэг тул есөн хөлт цагаан тугийн байгууламж нь өнө мөнхөд амьд шүтээн болох бэлгэдэл агуулж буй аж.